उदयपुर, ८ वैशाख । चौदण्डिगढी नगरपालिका–७ बेल्टार शान्ति चोकमा भएको भीषण आगलागीमा परी दुई जनाको मृत्यु भएको छ भने एक जना घाइते भएका छन्।

मृत्यु हुनेमा ७० वर्षीय लक्ष्मीनारायण खड्का र ३० वर्षीय पवन खड्का रहेका छन्। आगलागीमा परेर अस्मिता खड्का घाइते भएकी छन्। उनको बेल्टारस्थित नगर अस्पतालमा उपचार भइरहेको छ।

प्रहरीका अनुसार आज बिहान करिब पौने ३ बजेतिर लक्ष्मीनारायण खड्काको घरबाट आगलागी सुरु भएको थियो। आगो तीव्र रूपमा फैलिँदा लक्ष्मीनारायणसहित रबिन कुमार दास र सकलदेवको घर समेत जलेर नष्ट भएको छ। घटना हुँदा उनीहरू सबै सुतिरहेको अवस्थामा रहेका थिए।

जिल्ला प्रहरी कार्यालय उदयपुरका प्रमुख एसपी राजन चापागाईंका अनुसार सुतिरहेको अवस्थामै आगलागीमा परेर लक्ष्मीनारायण र पवन खड्काको ज्यान गएको हो।

आगलागी नियन्त्रणका लागि त्रियुगा नगरपालिका र चौदण्डिगढी नगरपालिका का दमकल, स्थानीय बासिन्दा र प्रहरीको संयुक्त टोली खटिएको थियो। उनीहरूको प्रयासपछि मंगलबार बिहान आगो नियन्त्रणमा लिइएको हो।

प्रारम्भिक अनुसन्धानअनुसार विद्युत् सर्ट भएर आगलागी भएको हुन सक्ने अनुमान गरिएको प्रहरीले जनाएको छ।